Liebe, Ehe und andere Sorgen

Mit de Frauen is´a so a Sach: Host oane, is´nix, host koane, is´zwoamoi nix. Drum san ma recht dankbar, dass ma unsere Frauen hammd. Obwoi --- es ist nicht alles Gold, was glänzt. Und manchmoi glänzt´s net amoi.

Über de Probleme moch i mir oiwei wieder Gedanken! „Liebe macht blind“, sogt a oids Sprichwort! „Oba Ehe macht wieder sehend.“

De junge Generation is do eh a wenig vorsichtiger mit der Ehe, de heiratn heut viel seltener und a später ois wia früher. Zu mir hot amoi an junger Kerl mit 22 Joa g´sogt: „I kann no net heiratn. Ich hob ja no nix derlebt!“ Do han i g´sogt: „Grod do muaßt heiratn. Do kannst ebbs derlebn!“

Do hot der grod drauf gsogt: „Des hob i scho g´hört, dass´im Hafen der Ehe auch Kriegsschiffe gibt!“

De Manner geht´s wia de Kartoffeln: Erst wenn´s an Kopf im Dreck drin hammd, gengand eahna d´Augn auf.

Und noch einiger Zeit geht´s los: Sie wirft eahm ´s Sauffa vor, er wirft ihr ´s Essn noch!

Oder wia a Oida Mooserer oiwei sogt: I mog de Mei gern, oba wenn´s oana liaba mog …?

Er sitzt seit Stunden im Wirtshaus, hot scho 12 Hoibe aufn Filzl steh. Sie trinkt a Wasser. Auf oimoi b´stellt sie sich a Packerl Soizstangerl und losst´s eahm aufs Filzl schreiben. Do gibt er ihr an Renna und sogt: „He, is bei uns da Woistand ausbrocha?“

Sie steht vorm Spiegel um jammert eahm laut vor: „s´Gsicht han i voller Foitn, das Busn hängt owi, da Hintern wird oiwei größer --- Sog hoit du wenigstens amoi ebbs Positivs, wos mi wieder aufbaut!“ Sogt er: „Sehng tuast einwandfrei!“

 

Dann passiert hoit des aa amoi: Sie steht mit 75 nockat vorm Spiegel. Dann sogt´s laut: Des vergunn i eahm.

Mit de Ehepartner is´wia mit´n Essn in an Restaurant. Man is recht z´friedn mit dem, wos ma se b´stellt hot. Bis ma sehgt, wos d´Leut am Nachbartisch kriangt.

Und d´Frauen hamm se mit da Emazipation aa verändert: Frühra hot oane kocha kinnt, wia ihr Mutter. Heut gibt´s oiwei mehra, de saufand wia da Vatta.

Und mit da ehelichen Treue geht´s aa oiwei mehr dahi. In da Zeitung han i g´lesn, dass jeder 12. Mann scho amoi Sex am Arbeitsplatz g´hobt hot! Stehts amoi auf!!! Wia mocht´s denn ihr des? Und wo? Besnkammer? Interessant in dem Zusammenhang: Bei Frauen sands a weng weniger??? Wia geht nachher des? (öfter die gleiche Frau?   Männer mit Männer?).

Er sogt: „Bis i gheirat hob, hob i gwisst, was wahres Glück ist. Aber iatz is´s z´spät.“

Oana von uns Huadara hot a ganz anders Problem (i mog iatz an Nam net sogn): Er is verheirat, hot drei Kinder und aa a Freundin. Eines Tages sogt de Freundin: „I möcht a Kind von Dir!“ Hot unser Freund grod g´sogt: „Do werd nix draus werdn, weil de Mei gibt koans her!“

Da Kuno hot oiwe Probleme ghobt, wenn ma Probe ghobt hammd, weil na de Sei net furtlossn woit. Do hamman amoi ins Gebet gnumma und hamma gsogt: „Wenn´s wieda sogt, du muaßt dahoam bleibn, dann haust aufn Tisch eine, reißt ´s Fensta auf, wirfst an Fernseher aussi und schreist: Und i tua, wos i mog!“ Nächste Probe war Da Kuno pünktlich do. Mir hamma uns g´wundert und hamma gsogt: „Wia host denn des gmocht?“ Do sogt er: „ I han in Tisch einig´haut, hob´s Fesnta aufg´ri ssn und an Fernseher aussig´schmissn und dann han i no g´schrian: Und i tua tua, wos i mog!“ „Respekt,“ hamma gsogt, und wia hot sie reagiert?“  Sogt da Kuno: „De war net dahoam!“

Wia i amoi gsogt hob, dass mei Frau a Kind kriagt, hamms grod gfrogt: „Und, wen host denn im Verdacht?“

Da Abb hot zum Bernd amoi gsogt: „Wos schenkst denn du deiner Frau zur Silberhochzeit?“ Sogt er: „A Reise in d´Karibik!“ „Ja du bist ja narrisch. Wos tuast  denn dann zur goldenen?“ „Do hoi i ´s wieder!“

Mit der Hochzeit ändert sich viel im Leben von Mann und Frau: Bei der Hochzeit hamms no gsunga: Wir wollen niemals auseinandergehn. Und dann schau´s noch 20 Joa an!

Zuerst hot er an Waschbrettbauch, dann an Waschtrommelbauch. Do kann oana oba nix dafür, des kimmt von an schlechtn Gen: Kühlschrankgehn!

Wos do in de Leut vorgeht, kimmt im Gotteslobliad so schön zum Ausdruck. „Ich will dich lieben …“

1.    Strofe: „Ich will dich lieben, meine Stärke …“

Noch an hoibatan Joa: 3. Strofe: „Ach dass ich dich so spät erkannte …“

Und noch zwoa weitere Ehejoa 4. Str.: „Ich lief verirrt und war verblendet.“

Mann und Frau sand oba aa völlig unterschiedlich, scho vom Gehirn her: Beim Mann is vorn das Sehzentrum und hinten das Denkzentrum.  Bei Frauen is vorn und hinten a Einkaufszentrum. Viele Frauen meinen, Deutschland hot nur zwei Bundesländer. Aldi Süd und Aldi Nord.

Zum Abb hot amoi de Sei gsogt: „Frühra host ma öfter wos g´schenkt. Heut schenkst mir nie mehr was!“ Do hot er grod gsogt: „An gfangtn Fisch gibt ma koan Wurm mehr!“ Am Valentinstog hot sie sich aa bschwert, weil´s koi Bleame kriagt hot. Do hot er grod gsogt: „Im Bleamegschäft warns z´teuer und am Kriegerdenkmal warn scho olle weg.“

Amoi hot a Mann bei an Kieferchirurgn angruafa: „Mei Frau hot se an Kiefer ausg´renkt und kann nimmer redn. Hätt´s ihr no an Termin im März 2031?“

Oba umgekehrt gibt´s des aa: A Frau hot im Bleameg´schäft gfrogt um a fleischfressende Pflanze, die wo 90 Kilo packt.

Und oane hot ganz stoiz ihra Freundin erzählt, dass sie letzte Woche 85 Kilo verlorn hot. „Wia is denn des ganga?“hot de gfrogt. „I hob mi scheidn lossn.“

Man sehgt für beide Geschlechter. „Bis dass der Tod uns scheidet!“, wia ma a so verspricht, des kann se ganz schö ziagn!

Und Frauen erzähln sich ja auch ganz blöde Witze.

Der Unterschied zwischn einem Mann und Nebel? Keiner. Wenn er sich verzieht, kann´s noch ein schöner Tag werden.  Des derf doch net sei, oder?

Oder: Wia nennt ma an Mann, der 90 % von seiner Arbeitskraft verliert? Witwer!   Oiso na!

Oder: Wie nennt man eine Frau, die wie ein Mann arbeitet?  Fauls Luada!   Na, na.

Vor kurzem han i a Inserat von a Firma in da Zeitung g´lesn: „Wir suchen 5 fleißige Männer oder ein Frau!“ Des hot garantiert da Frauenbund aufgebn.

 

So hamma hoit olle unsere Sorgen in da Ehe, bis aufn Franz.

Wenn i oft goa nimmer weiter woaß, dann hoi i mein Hochzeitfilm ausn Regal, leg na in DVD-Player eini und lossna rückwärts obalaufa. Do kann i so richtig trama.

Aktuelle Infos